A asociación Abrandares en Igualdade de Burela, personada como acusación particular nas gravacións ilegais de mulleres ouriñando durante A Maruxaina de 2019, no municipio lucense de Cervo, apura ao xulgado de Viveiro para que conclúa a investigación sobre estes vídeos e a súa difusión, nalgún caso, en páxinas de contido erótico.
A presidenta da asociación, María del Mar Fraga, sentenciou que “xa vai sendo hora que se saiba algo, que se conclúa coa instrución e de que teñamos noticias de como está a investigación”.
A activista lamentou que “non saben nada” do desenvolvemento desta instrución. Así, confesou que se atopan “decepcionadas”, xa que, “independentemente de que se confíe na decisión da xustiza, si que é certo que é esgotador todo isto”.
As gravacións producíronse fai case catro anos, en agosto de 2019, e “aínda continúa o goteo de declaracións das vítimas”, máis dun centenar, aínda que Fraga advertiu que esta fase poida que xa finalizase ou “conclúa esta semana”. “Todos os días che para a xente e pregúntache sobre aquilo da Maruxaina e como quedou, e dano coma se finalizase o tema”, expresou Fraga.
A continuación, insistiu en que “siga activo o caso”, á vez que apremou a que “o xuíz lle meta a maior prema á investigación” porque levan “moito tempo de espera”. Nun principio o xulgado de Viveiro arquivara a causa, ata que a Audiencia Provincial de Lugo obrigou ao xuíz a seguir coa instrución, que aínda non finalizou.
