O Concello de Cervo anima á veciñanza a participar no pedido conxunto de árbores froiteiras que tramita cada ano a delegación de Medio Ambiente, que dirixe Mali Méndez, “co obxectivo de revitalizar as fincas, para que sexan cada vez máis produtivas”.
Méndez recorda que os impresos estarán a disposición das persoas interesadas ata o 23 de xaneiro no Rexistro do Concello de Cervo.
CALLO FEST
Tres anos despois regresa o Callo Fest, organizado por Amigos da Troula en colaboración co Concello de Cervo e Seiramar. O festival celébrase o último venres do ano dende 2017 co fin de despedir o ano ao ritmo de rock.
Os concertos comezarán as 19:00H na carpa instalada na Praza dos Campos de San Cibrao e rematarán ben entrada a noite co reparto de callos para todos os alí presentes.
O cartel deste ano esta formado polo grupo galego Broken Peach, que ofrece un toque persoal ás típicas versións de rock, funky, gospel e pop, fusionando música e espectáculos extravagantes e Mileth, unha banda que xorde na Mariña Lucense co obxetivo de combinar folk e pagan metal nacido das raíces máis fondas do folclore e do enxebrismo galegos.
Contarase tamén con Mi rollo es el rock, un clásico da comarca que versionará as mellores cancións de rock e heavy metal da historia, e dende portugal chega ao festival Hybrid Park, a xa coñecida banda que recorre os escenarios co seu tributo á mítica banda estadounidense Linkin Park.
