O vindeiro 6 de maio a ACR Fervenza de Sargadelos, Fol do Raxal e Marmeladas A Morena organizan a sétima edición da Foliada de Cervo. Durante toda a xornada haberá diversas actividades relacionadas coa tradición galega. Ás 10h dará inicio o obradoiro de construción de pandeiretas, que será impartido polo artesán Sanín. As inscricións estarán abertas até o 2 de maio e poden realizarse en fervenzadesargadelos@gmail.com.

A partir das 12h varios grupos animarán os bares de Cervo, os cales repartirán tapas, e ás 14h que dará comezo a sesión vermú a cargo de Tumba e Dálle. Pola tarde continúan as actividades con xogos populares e co obradoiro de baile. Ás 18h 30 dará comezo o serán, no que actuarán grupos de toda a Mariña e de Lugo, e ás 22h 30 Tiruleque pechará as actuacións. Durante a xornada haberá feira de produtos artesáns e de alimentación, demostracións de oficios, sorteos e queimada.