Un grupo de voluntarios participou este xoves no programa de recollida de lixo Coida Cervo, que tivo lugar este mediodía na contorna da Ponte Medieval do Bao en San Cibrao.

Trátase dunha iniciativa promovida polo Concello de Cervo, que arrincou o pasado mes de setembro, e que se desenvolve como mínimo dúas veces ao mes (sempre que a normativa sanitaria vixente o permita). O seu eixo principal son as xornadas de voluntariado de recollida de lixo, pero tamén se programarán charlas, coloquios, actividades prácticas, saídas de campo e campañas para incentivar a reciclaxe selectiva; entre outras.

“Esta campaña naceu co obxectivo de poñer en valor as boas prácticas individuais no noso día a día no coidado e protección da contorna”, apuntan desde o Concello.  Coida Cervo tamén pretende ser unha ferramenta de reflexión  “coa que censurar certos comportamentos incívicos que se producen con frecuencia nas nosas vilas que prexudican a toda a veciñanza e son un atentado contra o noso patrimonio natural”.