Veciñanza da comarca da Mariña e traballadores da planta de Alcoa San Cibrao, en Cervo, volveron protagonizar este domingo unha multitudinaria concentración fronte ao Concello de Xove para urxir ao Goberno central, a través da Sociedade Estatal de Participacións Industriais (SEPI), a acometer a “intervención temporal” da fábrica. Esta protesta, na que participaron ao redor de 5.000 persoas –segundo cifras estimadas polo comité de empresa–, serviu tamén para lembrar que hai un ano do inicio das mobilizacións contra o ERE exposto o 28 de maio de 2020 pola multinacional.
Este expediente, que posteriormente foi suspendido polo Tribunal Superior de Xustiza de Galicia (TSXG), está agora pendente do que decida o Tribunal Supremo sobre o recurso presentado por Alcoa. En declaracións a Europa Press, o presidente do comité de empresa, José Antonio Zan, agradeceu a “moi boa” acollida que tivo a mobilización, que discorreu “nun ton reivindicativo” tras 365 días con máis de 500 empregos no aire.
A praza do Concello de Xove e as rúas lindeiras enchéronse este mediodía de cascos, monos de traballo, globos azuis e pancartas nas que se podían ler as xa habituais consignas ‘Enerxía solución’, ‘Alcoa sálvase loitando’ e ‘Madrid, escoita, A Mariña está en loita’. Mesmo fixeron saltar polo aire unha torta de aniversarios para simbolizar o tempo transcorrido desde a presentación do ERE.
OS TRABALLADORES, AÍNDA “PENDENTES”
E é que un ano despois, tal e como lamentou o presidente do comité de empresa, os traballadores seguen “pendentes” dunha intervención temporal por parte da SEPI que, de feito, é un “mandato do Parlamento de Galicia e do Congreso”. Esta compra pública temporal serviría, explica Zan, para que logo o Estado venda a fábrica a un terceiro que garanta nela a carga e os postos de traballo. Precisamente, o comité de empresa iniciará esta semana unha rolda de reunións cos posibles compradores, comezando o mércores con Liberty, primeira compañía que se interesou pola fábrica de San Cibrao.
CIG: “ALCOA SECUESTRA O FUTURO” DA MARIÑA
Por parte da Conferencia Intersindical Galega (CIG), participou na concentración o seu secretario nacional, Paulo Carril, quen afeou aos diferentes gobernos que “seguen sen querer dar unha solución definitiva” e permitindo que Alcoa “teña secuestrado o futuro de toda unha comarca”. Durante a protesta, Carril alertou de que canto máis tarde se dea saída a esta situación “máis se deteriorarán as instalacións, máis posición no mercado se perderá e máis nos aproximamos á resolución do recurso que Alcoa presentou contra a sentenza que anulou o ERE”.
Por iso, o dirixente da CIG subliñou que a SEPI “non pode escapar do seu papel protagonista na consecución dunha solución”, atendendo os “compromisos adquiridos, as declaracións aprobadas no Congreso e o clamor da Mariña”.
O PP PIDE Á SEPI “QUE CUMPRA”
Entre os diferentes colectivos sociais e políticos presentes na concentración, tamén estivo unha delegación do PP de Lugo capitaneada pola súa presidenta, Elena Candia, e polos alcaldes de Xove e Cervo, Demetrio Salgueiro e Alfonso Villares, respectivamente. Desde alí, os populares esixiron a intermediación do Ministerio para a Transición Ecolóxica e que “cumpra a SEPI”, xa que lamentan que o Estado e a propia multinacional non culminasen a negociación para a compravenda da planta.
“Hai compradores que seguen estando interesados, polo que non entendemos como estamos neste bucle que non leva a ningunha parte. O que precisan estes traballadores é unha solución e esta debe producirse no menor tempo posible. A indefensión é total e a desolación na Mariña non pode ser máis notable“, recalcou Salgueiro. Pola súa banda, Alfonso Villares urxiu a unha solución inmediata para poñer fin “ao desamparo” de todas as familias que se ven afectadas polo ERE.
