O Concello de Cervo dá novos pasos para adquirir os terreos contiguos ao Museo do Mar de San Cibrao, para poder ampliar as instalacións, que xestiona a Deputación Provincial de Lugo desde que lle fora cedido no ano 2003, cando pasou a integrarse na rede museolóxica dependente deste organismo.
Deste xeito, o concello aprobará no pleno da vindeira semana a Modificación Puntual das Normas Subsidiarias de Planeamento, comprometendo financiamento municipal para a adquisición desa finca anexa. Neste senso, a edil de Patrimonio, Dolores García Caramés, lamenta a falta de sensibilidade do organismo provincial á hora de poñer en valor “ese inmenso legado patrimonial que agocha o Museo do Mar de San Cibro, que atesoura o corazón da historia mariñeira da comarca, e nomeadamente do noso Concello que é, ademais, o museo público do Mar máis antigo de Galicia”.
O museo contén moita doazóns, entre elas, documentación gráfica,fondos etnográficos e de fauna mariña ou cartas náuticas. Caramés recordou que xa no pleno municipal do 26 de setembro de 2007 a corporación cervense acordou por unanimidade (cos votos a favor do PP, do BNG e do PSOE) que a Deputación Provincial de Lugo asumise os custos do proceso de ampliación do Museo do Mar.
Nestes terreos que se propoñen para o aumento do Museo establécese a ordenanza Residencial mixta -espazo, en ordenación mixta, destinado xeralmente á vivenda e usos complementarios-; mentres que no Museo establécese a ordenanza Dotacional -propia de espazos en ordenación aberta, destinados a usos dotacionais ou servizos de interese público tales como escolar, deportivo, recreativo, relixioso, sanitario, asistencia…-. Este cambio nas condicións urbanísticas permitirá pois o uso dotacional da superficie total que é de 2.568 m².
