O presidente da Xunta, Alberto Núñez Feijóo, subliñou este xoves o seu “respecto” polas decisións xudiciais, sobre todo se non se coñecen os detalles do sumario, despois de transcender que o xuíz que instrúe o caso das gravacións da festa da Maruxaina de Cervo volveu desestimar o caso.
Nun auto emitido a comezos de setembro que xa foi recorrido pola Asociación Mulleres en Igualdade Burela (Bumei) ante a Audiencia Provincial de Lugo, Pablo Muñoz considera que non existe delito nos vídeos de mulleres ouriñando na rúa captados con cámara oculta e que foron subidos a páxinas web pornográficas, algunhas delas de pago.
A decisión xerou polémica social e política, e preguntado respecto diso tras o Consello da Xunta, Feijóo respondeu que o seu respecto ás decisións xudiciais é “máximo”, pero tamén sinalou que o ocorrido na Maruxaina supón “un atentado contra a dignidade e intimidade” das mulleres vítimas. Dito isto, rexeitou profundar e “facer demagoxia” sen coñecer o detalle do sumario, máis aló de incidir en que non deberían ocorrer este tipo de situacións e en que, “se houbese probas”, se debería “perseguir aos autores”.
Iso si, aproveitou para volver esixir ao Goberno central que habilite un sistema de coordinación entre os corpos e forzas de seguridade e os provedores de contidos dixitais co fin de “evitar referencias nocivas en webs que promovan a violencia contra as mulleres”.
“Fomos a primeira comunidade en introducir a violencia dixital na lexislación”, reivindicou, para concluír que hai “ocos” na normativa que se deberían cubrir para protexer a sociedade “deste tipo de novas violencias”.
