O presidente do comité de empresa da planta de Alcoa San Cibrao, José Antonio Zan, confía que a asemblea de traballadores, convocada o luns, rexeite a proposta lanzada pola multinacional nas negociacións emprendidas esta semana. Zan argumentou que isto é o que espera: “Faltan as garantías que pediamos e non hai ningunha seguridade de que en 2024 vaian arrincar as cubas”.
A empresa pretende ese parón ata 2024 e, ademais, contempla un investimento de 90 millóns de euros na factoría de Cervo. Era a última oferta que realizaba e que non acaba de convencer ao comité de empresa.
En canto ao que poida suceder o luns, que se someterá a proposta a referendo dos empregados, Zan suxeriu que “o problema non é o voto dos traballadores, o problema é que os gobernos ao final debíanlle de dicir a Alcoa que as cousas se fan doutra forma”. “Esta forma non está á altura do século XXI, isto é máis ben do medievo”, afeou.
O presidente do comité insiste na necesidade dunha “intervención pública” e así volveu a reiterar que “a forma sería que o Goberno interviñese a empresa e pór encima da mesa un marco enerxético”. “Así estariamos salvados, pero o Goberno nin está nin se lle espera”, recalcou.
Finalmente, sobre se a oferta da empresa é unha “oferta trampa”, conclúe que “non se sabe”, para posteriormente incidir de novo en que segue “sen ter garantías” de que reinicien as cubas en 2024.