Un home de 70 anos resultou ferido nun accidente rexistrado este martes pola mañá ao saírse da vía o vehículo, do que tivo que ser excarcerado, no que circulaba ao seu paso polo municipio de Cervo.

Segundo informou o 112 Galicia, este sinistro tivo lugar no Polígono de Cuíña, á altura do tanatorio, sobre as 9,30 horas deste martes. Unha persoa chamou ao servizo de emerxencias para informar o accidente dun coche contra un noiro e solicitar axuda para un ocupante que permanecía no interior do turismo sen poder saír.

Por iso, os operadores do CIAE-112 Galicia notificáronlle os datos aos Bombeiros de Viveiro, ao GES de Cervo, ao persoal sanitario, á Garda Civil de Tráfico e aos membros de Protección Civil.

Finalmente, a dotación dos bombeiros desprazada ata o lugar comunicoulle ao 112 Galicia que excarcerara a unha persoa para que puidese ser atendida polos servizos sanitarios.

Ao lugar o 061 enviou unha ambulancia de soporte vital avanzado para atender ao ferido, J.M.V.S., de 70 anos, que foi evacuado ao Hospital Público da Mariña, confirmaron a Europa Press fontes sanitarias.