Os veciños de Cervo, un dos concellos sobre os que asenta a planta de Alcoa, atópanse “angustiados” desde o apagado das cubas o pasado 1 de xaneiro, un peche que se estende para os próximos dous anos. O alcalde deste municipio, Alfonso Villares, acreditou esa “angustia” entre os habitantes de Cervo, e esa “incerteza” que se cerne sobre a factoría de aluminio primario.

“É unha angustia, e a algúns interesoulles desviar os tiros e a responsabilidade a outras administracións no canto a solucionar un problema que sempre o tivo que solucionar o goberno de Madrid”, lamentou. Villares afeou que “hai moitas declaracións de políticos que agora din o contrario, que o teñen que amañar outras administracións cambiando de discurso cando gobernan en Madrid”, sinalou en relación ao PSOE.

O rexedor de Cervo, do PP, insistiu en que “quen ten que solucionar o problema sempre foi o Goberno de Madrid e para confirmalo só hai que tirar de hemeroteca”. “En tanto, estamos angustiados e angustiados, sobre todo, por ver que a mensaxe que se trasladou politicamente era unha mensaxe errada e cando se transmite unha mensaxe errada o verdadeiro responsable de resolver o problema vaise tranquilo ao ver que ninguén o responsabiliza directamente”, afirmou.