Dúas persoas resultaron feridas a madrugada deste sábado despois de que o vehículo no que circulaban saísese da vía na parroquia de Rúa, no municipio lucense de Cervo.

Un dos ocupantes do turismo tivo que ser excarcerado polos servizos de emerxencia ao quedar atrapado no interior a causa do impacto.

Segundo informou o 112 Galicia, o accidente tivo lugar ao fío das 03,00 horas. A esa hora, Urxencias Sanitarias de Galicia-061 alertaba á central de emerxencias da saída de vía dun turismo.

Con esta información, o CIAE-112 Galicia solicitou a intervención dos Bombeiros de Viveiro, do GES de Cervo e da Garda Civil de Tráfico. Ademais, informouse os Bombeiros de Barreiros.