As actividades socioculturais no Concello do Vicedo continúan nesta ocasión con teatro infantil a cargo de Ghazafelhos Teatro
A compañía presentará a obra “A Caixa sen Pandora”. Será este xoves día 7 a partir das 16:45h na Casa da Cultura do Vicedo con entrada gratuita. “A caixa sen Pandora” é unha historia protagonizada por Montse Piñón e Pepablo Patinho que nos lanza unha pregunta: Que pasaría se Pandora non chegase a abrir a caixa?
Esta obra de Teatro Ghazafelhos relaciona a lenda de Pandora coa loita pola igualdade das mulleres. Trátase dun repaso divertido das distintas mulleres universais en xeral, e galegas en concreto, que decidiron romper coa norma establecida e abrir a súa propia caixa iniciando un movemento imparable pola igualdade. Despois de todo, queremos nós abrir a nosa propia caixa?