A empresa de transporte de viaxeiros por estrada Arriva trasladou o seu compromiso de aumentar as prazas e os reforzos para dar servizo aos usuarios da ruta desde Viveiro a Santiago e A Coruña, despois de que, na tarde deste domingo, varios viaxeiros tivesen que quedar ‘en terra’ debido á falta de prazas, e fosen trasladados finalmente por un autocar fretado polo Concello.
Segundo informaron fontes da compañía, o incidente rexistrado na tarde deste domingo debeuse, por unha banda, a un “aumento inesperado da demanda”, superando o cociente de pasaxeiros habituais para ese traxecto; e por outro, ao feito de que o vehículo que fai habitualmente a ruta sufriu unha avaría, e habilitase outro, o que estaba dispoñible nese momento, con menos prazas.
Sobre o incremento de viaxeiros, unha situación “que non se podía prever”, a compañía sinalou que está “a analizar as causas” e, ante a dispoñibilidade dun bus máis pequeno, Arriva sinalou que puxo un reforzo pero, “lamentablemente non puido dar resposta a tempo aos usuarios afectados”.
“Para evitar situacións como esta, a futuro aumentaremos os reforzos e prazas dispoñibles, de forma que o tempo de resposta ante calquera aumento de demanda sexa inmediato. Do mesmo xeito, Arriva lamenta as molestias producidas aos pasaxeiros e ponse adisposición destes para calquera dúbida ou comentario a través das súas canles oficiais de atención ao cliente”, apuntou a empresa a través dun comunicado.
BUS FRETADO POLO CONCELLO
Pola súa banda, a alcaldesa de Viveiro, María Loureiro, explicou a Europa Press que varias familias contactaron con ela na tarde deste domingo, para explicar que, ao non haber prazas suficientes no autocar, soamente foran trasladados os viaxeiros que ían a Santiago.
Deste xeito, “quedaron uns 22 ou 25 mozos e mozas”, estudantes, que tiñan como destino A Coruña, na estación de buses, sen alternativa para desprazarse. Debido a que moitos tiñan exames este luns á primeira hora, e que as súas familias non podían levalos, ao que se suma que “as conexións desde Viveiro a Santiago e A Coruña son nefastas“, o propio Concello de Viveiro fíxose cargo do devandito traslado.
Así, a propia alcaldesa púxose en contacto cunha empresa local, para que se puxese a disposición dos afectados un autocar. Así mesmo, explicou a rexedora que, xa en ocasións anteriores, houbo incidentes con esa liña, que xa foron postos en coñecemento de Mobilidade da Xunta.
