A subdelegada do Goberno en Lugo, Isabel Rodríguez, e a alcaldesa de Viveiro, María Loureiro, copresidiron este mércores a Xunta Local de Seguridade para planificar o dispositivo especial para a Semana Santa de Viveiro, declarada de Interese Turístico Internacional.
Segundo trasladou a Subdelegación do Goberno nun comunicado, na reunión analizouse o calendario de eventos que se desenvolverán no municipio entre os días 1 e 9 de abril para reforzar a vixilancia con axentes de Policía Nacional, Policía Local e Tráfico da Garda Civil.
Deste xeito, o obxectivo é manter a orde pública con dispositivos que “serán flexibles e adaptaranse á afluencia de público prevista”. Estes cubrirán o centro histórico e os percorridos das diferentes confrarías, ademais doutros puntos de interese da localidade.
Nesta liña, Rodríguez resaltou que o Goberno de España “mantén o seu compromiso e sensibilidade cun dos eventos de maior atracción turística” na provincia, xa que “forma parte do acervo cultural”.
