O vento que azoutou Galicia durante este xoves, especialmente nas provincias da Coruña e Lugo, deixou refachos máximos de ata 131,5 quilómetros por hora en Viveiro.

Os medidores de Meteogalicia tamén captaron outro refacho que superou o 120 km/h. Tivo lugar na Pontenova minutos despois das 18,10 horas, cando se alcanzaron o 124,5 km/h.

E é que o forte vento deixou intensidades de máis de 100 km/h en moitos puntos da Comunidade, tanto na costa –en Cedeira chegou ao 117,6 km/h– como no interior –Vimianzo e Abandín roldaron o 110 km/h–.

O forte vento mantivo en alerta a boa parte da comunidade galega, especialmente a Costa da Morte e o noroeste da Coruña.

De feito, obrigou a suspender en Santiago as actividades deportivas ao aire libre e clausurar os parques, decisión que tamén adoptou o Concello da Coruña coas visitas á Torre de Hércules.