A Real Filharmonía de Galicia (RFG) inaugurou a décima edición do ‘Festival Bal y Gay’ este xoves 10 de agosto no Teatro Pastor Díaz de Viveiro con todas as entradas esgotadas. A prestixiosa orquestra, emblema cultural da comunidade galega con máis de 25 anos de historia, estivo dirixida por Maximino Zumalave con Adriana Winkler como concertino e 45 músicos sobre o escenario.
A RFG, que abriu o festival por cuarto ano consecutivo tras debutar en 2020, comezou a súa actuación coa ‘Oda a Don Quixote’ de Xesús Bal y Gay como homenaxe á figura do crítico, musicólogo, compositor e profesor lucense. Posteriormente, ofreceu ‘Pulcinella (suite, rev. 1949)’ de Igor Stravinsky e a ‘Sinfonía nº. 40 en Sol Menor’ de Wolfgang Amadeus Mozart como obra final do programa.
Foi a primeira das 14 actuacións previstas ata o 24 de agosto no evento, referente de música clásica en España polas súas excelentes propostas artísticas en espazos emblemáticos da Mariña. Preto de 4.000 espectadores acudirán aos seus concertos nas próximas dúas semanas.
ALFOZ
Kebyart, talentoso cuarteto de saxofones e un dos grupos máis prometedores da escena musical actual, protagonizará a segunda xornada do décimo ‘Festival Bal y Gay’ coa súa actuación prevista para este sábado 12 de agosto no Castelo de Castro de Ouro en Alfoz (20:30 horas) con todas as entradas esgotadas. Pere Méndez (saxo soprano), Víctor Serra (saxo alto), Robert Seara (saxo tenor) e Daniel Miguel (saxo barítono) ofrecerán obras de Mozart, Shostakovich, Widmann e Pérez-Villegas.
A recoñecida formación, creada en 2014, realizou máis de 200 concertos con xiras por Europa e Asia. Kebyart visitará A Mariña para concluír unha tempada 22-23 repleta de grandes escenarios como o Tonhalle de Zürich, o Wigmore Hall de Londres, a Stiftung Mozarteum de Salzburgo, o Stadtcasino de Basilea ou festivais como Lockenhaus, Heidelberger Frühling e a Schubertiada de Vilabertran.
