O conselleiro do Mar, Alfonso Villares, participou este sábado no acto de entrega da Medalla de Ouro da Moi Nobre e Moi Leal Cidade de Viveiro á Confraría de Celeiro, con motivo da celebración do seu centenario.

O titular de Mar celebrou este recoñecemento ao depósito e enxalzou o seu compromiso e os 100 anos de traballo desta entidade na defensa dos profesionais do sector e do porvir da súa actividade.

Na súa intervención no acto, eloxiou a traxectoria da confraría máis antiga da provincia de Lugo e o labor dos 18 patróns maiores que van desde o primeiro en 1923, Bonifacio Cora, Pañoletas, ata Domingo Rei Seijas, que lidera a confraría na actualidade.

Alfonso Villares puxo en valor a importancia do porto de Celeiro, no que a pescada é o produto estrela, acaparando no 2022 o 45% das descargas e preto da metade do valor xerado nas lonxas galegas.

Tamén destacou que as 25 embarcacións vinculadas a este porto lucense concentran case o 30% de toda a capacidade pesqueira desta especie en augas europeas e que conta con dúas marcas Pescada do petisco de Celeiro e Pescada de volante de Celeiro para pór en valor un produto extraído polos armadores lucenses no Gran Sol a través de artes selectivas e sustentables.