A alcaldesa de Viveiro, María Loureiro, cualificou ao vicepresidente do Goberno autonómico e conselleiro de Xustiza, Alfonso Rueda, de “irresponsable” tras suxerir que a tardanza en habilitar unha sala de espera para as vítimas de violencia de xénero nos xulgados da vila, tal e como reclamaban os traballadores, debeuse “á falta de celeridade” do Concello.
Loureiro defende que desde o executivo municipal “realizáronse as xestións oportunas para a formalización da cesión de uso gratuíto de varios locais para a ampliación dos xulgados de Viveiro a favor da Consellería de Presidencia, Administracións Públicas e Xustiza”. A rexedora en funcións sinala que o acordo plenario foi adoptado en novembro de 2015 e recepcionado pola Xunta o 15 de decembro.
Loureiro afirma que o deputado no Congreso do Partido Popular (PP) e concelleiro na corporación viveirense, Jaime de Olano, “solicitou que se lle enviase de novo a documentación, entregada o 14 de xuño de 2018”.
Despois da queixa de dous funcionarios e integrantes da Mesa Local de Coordinación contra a Violencia de Xénero, que alertaron de que as vítimas de violencia machista esperaban durante horas para denunciar os seus agresores nun espazo copado polo arquivo, incómodo e con mobiliario suxo e escaso, o 16 de abril de 2019 “remitiuse un rogo desde o Concello de Viveiro á Dirección Xeral de Xustiza”.
ESTE XOVES, “PRIMEIRA COMUNICACIÓN” AO RESPECTO
Loureiro engadiu que “este xoves, logo do tempo transcorrido, tivemos a primeira comunicación ao respecto por parte da Xunta, na que se nos solicita o título de propiedade para a tramitación, o cal é mostra evidente de que o Concello non estaba a paralizar o proxecto”.
Así, a rexedora conclúe que “é unha irresponsabilidade por parte do vicepresidente da Xunta facer no Parlamento estas declaracións que son mentira”.
