A muller ferida na colisión entre un coche e un camión da mañá deste luns na curva de Escourido, na parroquia viveirense de Covas, morreu tras ser trasladada ao Hospital da Costa.

A falecida, Aurelia Pena Fernández, tiña 85 anos e residía no Vicedo dende hai décadas.

HOSTALEIRA

Na localidade vicedense era coñecida porque rexentou un local de hostalería na praia de Arealonga, que levaba o seu mesmo nome.

COLISIÓN

O 112 recibiu aviso do accidente, que ocorreu na LU-862, ás 9.35 horas. A central mobilizou a profesionais do servizo de emerxencias sanitarias, aos Bombeiros do parque de Viveiro e á Garda Civil de Tráfico.

O turismo afectado quedou destrozado pola parte de diante e os bombeiros deberon sacar á muller, sen que fose preciso excarcerala.

O condutor do camión resultou ileso.