O Concello de Viveiro será o escenario o próximo día 26 de xuño dunha nova edición da Copa de España de Ciclismo Adaptado, unha proba que xa acolleu no ano 2019. A organización estima que a proba reunirá uns 50 deportistas de todo o Estado, incrementando a participación con respecto a súa primeira edición.
Entre os participantes, estarán Iván Montero, actual campión de España de ciclismo adaptado e presidente de Paraciclismo Galicia que, na presentación do evento, definiu a proba de Viveiro “como a máis dura e a máis bonita do ano” e comprometeu “espectáculo e esforzo dos ciclistas na carretera”.
A Copa de España de Ciclismo Adaptado comezará ás catro da tarde en Celeiro con dous percorridos segundo o nivel de diversidade funcional dos deportistas.
“VALORES”
A Deputación de Lugo acolleu este martes a presentación desta proba coa asistencia da alcaldesa de Viveiro, María Loureiro; o deputado de Deportes na Deputación, Efrén Castro; o concelleiro de Deportes, César Iglesias Docal, e César Lage Pérez, presidente do Club Ciclista Viveiro, organizador da proba.
“O ciclismo adaptado mellora a calidade de vida das persoas que o practican e reforza a súa socialización e integración, además de potenciar as súas capacidades e a súa autoestima, todo combinado cos valores que caracterizan o deporte, como a constancia, a humildade, o sacrificio, o esforzo e a dedicación”, dixo a rexedora María Loureiro.
Pola súa banda, o deputado Efrén Castro subliñou o compromiso da área de Deportes cos
clubs e cos concellos para sacar adiante eventos deportivos coma este, “que é unha referencia no calendario estatal”. “É, ademais dunha obriga, un orgullo colaborar na promoción do deporte e máis aínda na promoción do deprote inclusivo, que está a medrar e buscar o seu oco”, expuxo.
