O BNG de Viveiro rexeita a prohibición do Concello de Viveiro de prohibir a presenza de animais nos seus areais porque, di, “existen alternativas de baixo custe e pouco ambiciosas que permiten o uso compartido de praias e zonas verdes da veciñanza coas mascotas”

Por iso, presentou unha moción na que pide “acoutar zonas con estacas e cordas, e/ou colocar paneis informativos coas normas de convivencia e as sancións por incumprimento”. Tamén reclama colocar á beira das praias un posto/caseta que ofreza ás persoas usuarias estacas para atar os cans, papeleiras para depositar os excrementos, a instalación dunha mangueira ou duchas para cans. “É un proxecto que ademais contribuiría a potenciar o turismo con mascotas no noso concello”, indica nun comunicado.

Así, critica que no concello segue sen existir posibilidade legal de que os cans “corran, salten, se bañen e socialicen con outros cans, o cal é vital para o seu desenvolvemento saudable e equilibrado”. Por iso, insiste en que é totalmente necesario dotar Viveiro destas zonas, tendo en conta que ademais de proporcionarlles ese dereito tamén suporía a medida máis urxente e máis efectiva “para previr e controlar as molestias e perigos que os animais podan causar a persoas e instalacións”.