Dende o pasado 2 de xullo, acompañado por catro amigos, Santi Chao realiza unha travesía duns 1.800 quilómetros e cun desnivel positivo de máis de 30.000 metros, para ascender a 26 portos de montaña en 16 etapas, atravesando cinco países.
A travesía partiu de Trieste, en Italia, e finalizará na cidade francesa de Niza o vindeiro 18 de xullo. Unha nova fazaña que o viverense asume 20 anos despois de recibir un transplante de corazón e coobxectivo de dar visibilidade á importancia de ser doante de órganos, tecidos e medula ósea para salvar vidas.
O Concello de Viveiro quere recoñecer publicamente a Santi Chao polo novo reto deportivo que está a desenvolver estes días.Este novo reto, que se suma aos moitos realizados polo deportista viveirense dende 2011, “serve para dar visibilidade e normalidade a este tema, promovendo as doazóns e demostrando que a práctica deportiva a este nivel é posible despois dun transplante”, indican desde o concello.
“É todo un orgullo o labor que Santi Chao vén realizando, ademais de ser un exemplo de esforzo e superación. O goberno municipal quere felicitar a Santi Chao e aos seus compañeiros por esta iniciativa benéfica e enviarlles moitos ánimos para que logren rematar este gran reto”, indica nun comunicado.
Tanto no seu Facebook (Santi Chao) como no seu perfil de Instagram (santichaotwohearts), o deportista viveirense publica crónicas das diferentes xornadas e explica os detalles deste reto, baixo o cancelo #transalpinatransplantado.
