O Concello de Viveiro acollerá durante o mes de agosto o programa ‘Veran(e)arte’, con espectáculos culturais pensados para un público familiar, con aforos limitados e un cumprimento estrito de todos os protocolos Covid-19.

A concelleira de Cultura, Lara Fernández Noriega, explica que “terán cabida no programa todo tipo de expresións artísticas, desde circo, maxia, contacontos ou grupos musicias, cunha aposta moi clara pola cultura galega e local”.

O programa ten dúas modalidades, unha de espectáculos ao aire libre en espazos como os Xardíns Noriega Varela, o parque Pernas Peón, Covas ou Celeiro, e unha segunda con actividades no Teatro Pastor Díaz. Todas as actividades serán de balde excepto o concerto familiar ‘Yo soy ratón’. As charangas programadas actuarán exclusivamente pola mañá e farán parada só no templete da música (Xardíns Noriega Varela).

Un dos concertos programados, o de Guadi Galego o 16 de xullo no parque Pernas Peón, será inclusivo para a comunidade xorda, polo que estarán dispoñibles as mochilas vibratorias Subpac das que dispón o Concello de Viveiro. Todos os eventos terán aforo limitado e protocolos Covid-19, polo que será preciso chegar 30 minutos antes para evitar aglomeracións.