O BNG solicitou a presenza da alcaldía para dar conta da situción laboral en que está “unha traballadora do Concello de Viveiro que leva 27 anos prestando servizo para o mesmo”. Segundo o grupo municipal nacionalista, a traballadora recibiu unha comunicación a finais de agosto, en concreto o día 27, segundo a cal, sería dada de baixa na Seguridade Social como empregada do Concello a partir do día 1 de setembro.
Segundo o Bloque o despido “execútase tendo a traballadora por sentenza xudicial adxudicada unha praza definitiva como persoal laboral do Concello de Viveiro”. Isto incluía unhas características concretas de salario e horario. Este caso é interpretado como “un despido da traballadora baixo orde da alcaldía, que canto menos precisa xustificación e explicación dos motivos de tal actuación”.
Pola súa parte, desde a alcaldía de Viveiro sinalan que este mesmo xoves día 7 “demos a documentación e os informes relativos ao caso que apunta o BNG”. Nese sentido, convocouse un pleno extraordinario para o día 21 de outubro para explicar os motivos e procedementos que se seguiron no caso da empregada de limpeza.
Desde a alcaldía sinalan que “todos os procedementos foron realizados de acordo cos servizos xurídicos e por tanto, non hai nada que esconder”. Apuntan ademais que o BNG realizou as primeiras acusacións de presuntas irregularidades “antes de ver a documentación” sobre este tema.