Óscar Rodríguez foi elixido este sábado como novo presidente do PP de Viveiro. O popular asume así a dirección do partido, na que estará acompañado de María del Carmen Gueimunde González na secretaría xeral e por Teresa Pérez Rodríguez Seijo na subsecretaría xeral.
Nas súas intervencións, das que informou o PP de Lugo nun comunicado, o novo presidente local do PP destacou que quere incrementar a base da formación e alargar a organización a través da incorporación de novos afiliados, tarefa á que se dedicou con intensidade desde que asumiu a portavocía local.
Así, busca lograr un PP de Viveiro “aínda máis unido, máis activo e motivado para buscar solucións aos problemas do concello”. E é que, entre outras cuestións, Óscar Rodríguez lamentou a falta de políticas municipais de apoio á industria de Viveiro, aludiu á grave situación que atravesan Alcoa e Vestas, e lamentou o “pouco peso” da alcaldesa, María Loureiro, no seu partido, o PSOE.
Na súa elección, Óscar Rodríguez estivo arroupado pola presidenta do partido a nivel provincial, Elena Candia, e polo vicesecretario de Participación do PP nacional, Jaime de Olano; ademais de por o secretario xeral do PPdeG, Miguel Tellado. No acto, Candia felicitou a Rodríguez e ao seu equipo, sobre os que depositou a “confianza absoluta da dirección provincial para que Viveiro volva ter un goberno do PP”.
Na súa intervención, ademais subliñou a importancia do cambio que necesita Viveiro. “Todos sabemos como está A Mariña, todos sabemos que o Goberno central o que fai é dar as costas a Alcoa, a Vestas e, mentres, a nosa comarca polo único polo que é noticia a nivel nacional é pola destrución de emprego”.
Ademais, volveu a esixir que o Executivo socialista interceda a través da SEPI para que a venda de Alcoa sexa efectiva e garanta, sobre todo, o mantemento da empresa e os empregos que xera. En canto a Vestas, sinalou que a Xunta ten contactos con empresas que poderían ser potenciais compradoras e, mentres, o Goberno central “non está polo labor de buscar un comprador que garanta a continuidade da actividade e preserve o emprego na factoría de Viveiro”.
