O BNG de Viveiro deu a coñecer unha serie de medidas que consideran non deberan ser pasadas por alto polo goberno municipal.

Entre as propostas dos nacionalistas en Viveiro figura atender a situación das estradas  de titularidade do Concello de Viveiro. “O BNG xa propuxera un elaborado Plan de Mantemento de Estradas Municipais, con políticas convenientemente estruturadas e axendadas que incluía tarefas de mantemento, conservación e mellora de estrada”.

Sinalan que o plan proposto foi rexeitado en pleno pero “no que se ve da súa necesidade con cada día que pasa, sen observación nin planificación das obras e actuando tan só baixo denuncia pública“. Como exemplo disto poñen as accións de hai uns meses “en Boimente a traves das redes sociais e do BNG, e hai uns días nas Pallaregas á raiz dunha exitosa recollida de sinaturas veciñal queixándose do abandono das estradas competencia do Concello”.

Outra das propostas do BNG viveirense é a mellora da comunicación por Internet de alta velocidade. “O BNG xa reclamou da administración local, autonómica e estatal, unha solución tecnolóxica para estes núcleos rurais de Viveiro que están en zonas de sombra“.

Por último, para o grupo nacionalista é necesario dinamizar o rural apoiando o sector cárnico. “O matadoiro municipal leva 10 meses pechado pola carencia de traballos de inspección, comprobación e supervisión á subcontrata”. Denuncian tamén que agora que está pechado, “tampouco se ve interés nin avances para a súa reapertura da que dependen gandeirías e carnizarías do noso concello e arredores”.