A web viveiroenruta.com, segundo o BNG de Viveiro, ponse en marcha “ante a gran demanda veciñal e a ausencia de políticas municipais neste eido, co obxectivo de facilitar rutinas e hábitos saudábeis así como de dar a coñecer a nosa envidiábel contorna natural”.
O obxectivo de viveiroenruta.com ten a “pretensión de ser un proxecto colaborativo que se nutra da participación veciñal, polo que calquera pode contribuir compartindo a súa ruta para que figure na web”, incidíu Míriam Bermúdez.
Bermúdez engadiu que con esta web “enriquecemos o abano de actividades en Viveiro contribuíndo de maneira real a desestacionalizar o turismo, potenciando as actividades de ocio ao ar libre e saudábeis”.
WEBS DO CONCELLO
“O Concello de Viveiro a pesares de teren dúas páxinas web en ningunha se poden visualizar rutas ou algunha outra forma de motivación deportiva e de ocio” afirmou Míriam Bermúdez.
A mesma Míriam Bermúdez sinalou que o BNG presentou “unha Moción para transformar a páxina web do Concello de Viveiro nun servizo público transparente e actualizado”. Tamén apuntou que o BNG levou outra moción en 2020 “para a sinalización e promoción dos rutas de sendeirismo, aprobada en pleno, mais tamén sen feitos”.
