Unha vintena de mulleres que foron vítimas de gravacións cando ouriñaban na rúa durante a festa da Maruxaina, no municipio de Cervo en 2019, e que mesmo foron subidas esas imaxes a páxinas porno, acudiron este venres ao xulgado de Viveiro a prestar declaración ante o xuíz instrutor.

A presidenta da Asociación de Mulleres en Igualdade de Burela, personada como acusación popular, María del Mar Fraga, confirmou que “máis ou menos” sobre vinte mulleres foron as citadas a declarar este venres.

“Seguimos avanzando aos poucos. Esperamos que a partir de agora se axilice un pouco máis o proceso de declaración porque hai moitas mulleres que están a desexar contar ao xuíz o que lles ocorreu e quedar tranquilas. Isto prodúcelles tensión e canto antes pasen mellor”, desexou.

Fraga constatou que das cen mulleres vítimas das gravacións xa só queda “unha cuarta parte” para prestar declaración ante o xuíz de Viveiro que leva esta investigación. Tamén advertiu de que lle consta “que as mulleres que van declarar por videoconferencia e que viven fóra aínda non foron citadas”. “Pero visto a chamada a este grupo de mulleres isto pode indicar que a cousa se vai axilizar”, abundou.

A continuación, puntualizou que “non” teñen “ningunha noticia” sobre o sospeitoso ou os sospeitosos de gravar as ditas imaxes durante a tradicional festa no municipio de Cervo.

“LENTITUDE”

“Supoño que o proceso se leva a cabo e téntase que non transcenda o que están a investigar. A nós non nos chega información e entendémolo porque se ás veces che contan como vai a investigación pode resultar contraproducente. Entendemos que se proceda así”, subliñou. María del Mar Fraga finalmente queixouse da “lentitude” da Xustiza, tras tres anos e aínda en fase de toma de declaracións.