A institución provincial asinou un convenio de colaboración co concello de Viveiro para o financiamento das melloras do exterior do Centro Ocupacional deste municipio mariñense.
Mediante este convenio, a Deputación de Lugo achega ao concello de Viveiro 45.000 euros para o acondicionamento e drenaxe exterior do Centro Ocupacional xestionado por Aspanane, unha asociación que atende a 44 persoas con discapacidade intelectual e ás súas familias.
Os 5.000 euros restantes para completar o orzamento necesario para as obras serán achegados polo concello lucense, de forma que o investimento ascende a unha contía total de 50.000 euros. As obras consistirán no acondicionamento do recinto exterior do centro, desde a ampliación da zona asfaltada ata a creación dunha “ampla” zona verde para conseguir “espazos agradables”. Ademais, o proxecto inclúe a realización dunha drenaxe perimetral do edificio para evitar filtracións de auga ao interior do inmoble.
