O xulgado de insturcción número 1 de Viveiro dirixiu unha investigación internacional que permitiu a desarticulación dunha rede dedicada á realización de estafas a través do método coñecido como ‘SIM swapping’ ou suplantación do cartón SIM.

O operativo concluíu coa detención de tres persoas, acusados de pertencer a unha organización integrada por persoas que residían na Coruña, Ferrol, Narón, Almendralejo (Badaxoz), Madrid, Torrexón de Ardoz (Madrid) e República Dominicana.

A Garda Civil atribúe a este grupo unha estafa de 37.000 euros solicitados cun modus operandi que consistía en dous pasos. Primeiro, obtiñan os datos da vítima para acceder á súa banca en liña e provedores de pago e, en segundo lugar, lían de forma ilexítima as mensaxes de información do sistema de verificación da 2FA, que remite ao comprador unha mensaxe para comprobar a súa identidade.

Para o primeiro paso, os ciberdelincuentes utilizaban diversas técnicas –phishing, pharming, malware, ou posicionamento de páxinas fraudulentas en buscadores– para obter as credenciais bancarias, os datos persoais e o teléfono de contacto das vítimas.

Cando dispuñan destes datos, solicitaban á operadora telefónica nunha tenda física con documentación falsa un duplicado dos cartóns SIM, para recibir os códigos de verificación das transferencias enviados polas entidades bancarias.

As transferencias eran enviadas a contas de entidades bancarias en España e República Dominicana a nome de membros do grupo criminal. Estes retiraban o diñeiro en caixeiros para, posteriormente, entregarllo a membros que ocupaban un chanzo superior na trama.

O grupo estaba integrado por un total de 14 persoas de distintas nacionalidades –sete españois, tres venezolanos e catro dominicanos–. Tres foron detidos e outros dous permanecen investigados.

Atribúenselles seis estafas cometidas a vítimas residentes en España, ademais doutros delitos como pertenza a grupo criminal, estafa continuada, branqueo de capitais, usurpación de estado civil, ameazas e branqueo de capitais.

MULAS DE DIÑEIRO

Segundo explicou a Garda Civil nun comunicado, as coñecidas como ‘mulas’ de diñeiro son captadas a través de Internet para recibir transferencias froito da comisión destes delitos. Neste caso, foran contactados de forma directa polos membros da rede para exercer de intermediarios na subtracción de diñeiro.

Estas persoas recibían unha comisión a cambio de que as cantidades estafadas pasasen por contas ao seu nome para, posteriormente, ser transferidas aos xefes da trama. As forzas da orde chaman a extremar as precaucións ante este tipo de feitos, dado que as estafas por Internet son a modalidade delituosa que maior crecemento experimenta durante os últimos anos.