A Festa da Merluza do Pincho de Celeiro recibiu o premio á excelencia do turismo e á gastronomía da provincia ‘…E para comer, Lugo’. O galardón será entregado pola Deputación de Lugo nunha gala o próximo 27 de setembro, Día Mundial do Turismo.
A candidatura foi presentada polo Concello de Viveiro co obxectivo de aumentar o recoñecemento deste encontro culinario. “Este premio confirma de novo a relevancia da Festa da Merluza do Pincho de Celeiro, consolidada como un atractivo turístico e gastronómico a nivel galego”, sinala a alcaldesa María Loureiro. O propio Concello colabora coa organización desta festa culinaria.
A Festa da Merluza do Pincho de Celeiro pon en valor a este produto, pescado artesanalmente polos barcos locais. Durante a celebración, prepáranse uns 800 kg de peixe que se degustan en distintas elaboracións.
“Agradecemos o esforzo dos veciños e veciñas, especialmente de Celeiro, e das entidades que colaboran nesta festa cada ano, en especial á ACD Penalba de Celeiro, impulsora da festa, cuxo traballo permite obter este tipo de recoñecementos”, destaca a rexedora viveirense.
O premio ‘..E para comer, Lugo’ cumpre xa a súa terceira edición e conta con outras dúas categorías: “Lugo Cambia”, ao turismo lucense e “Turismo Sostible”.