O Concello de Viveiro responde ao BNG, as torres de iluminación de Lavandeiras son municipais

O Concello declara que para o festival Resurrection Fest a organización contrata un cadro para ter a potencia necesaria.


O goberno municipal de Viveiro enviu este xoves unha nota coa que “quere aclarar, a raíz das declaracións realizadas pola voceira do BNG en relación coa súa proposta á organización do Resurrection Fest, que as torretas de iluminación do campo de Lavandeiras pertencen ao Concello de Viveiro”. A instalación foi parte dos traballos realizados nos últimos anos na zona de Lavandeiras, “permanecendo instaladas ao longo de todo o ano”.

Por outra parte, a Xunta de Galicia, a Deputación de Lugo e o Concello de Viveiro están negociando un convenio para realizar diversas actuacións de mellora no Campo de Lavandeiras. Os traballos incluirán unha dotación de vestiarios e banquillos, así como traballos para garantir o abastecemento eléctrico en todo o campo para a súa actividade deportiva habitual.

O Concello sinala sobre isto último que “é unha cuestión que a voceira do BNG debería coñecer, tendo en conta que estaba presente na reunión que este concello mantivo co Deputado Provincial de Deportes”.

Desta maneira, o Concello sinala que o Campo de Lavandeiras conta coa infraestrutura básica (torretas de iluminación, canalización, ente outras facilidades), “estando simplemente pendente da súa adaptación e alta para as actividades deportivas”.

Segundo o goberno local, o  único que fai a organización do Resurrection Fest é contratar e instalar para eses días o cadro eléctrico coa potencia que necesitan para un festival destas características.

RESPOSTAR

Please enter your comment!
Please enter your name here