A alcaldesa de Viveiro, María Loureiro, admitiu este mércores estar preocupada polos postos de traballo que se poidan perder no municipio polo veto imposto pola Unión Europea á pesca de fondo e que se porá en marcha a partir do próximo nove de outubro se finalmente non se dá marcha atrás.
Loureiro admitiu que corren risco “moitísimos postos de traballo”, facendo fincapé en que “o sector pesqueiro é un sector moi importante en Viveiro, xunto co sector servizos”. “A pesca é un sector fundamental e move moitos postos de traballo”, incidiu. A rexedora admitiu que está “preocupada” por esta situación, que se engade ás dificultades económicas xeradas pola pandemia, que “este veto complica aínda máis”.
No entanto, María Loureiro expresou a súa confianza “nas administracións, no goberno de España e na Xunta de Galicia” para, con presión, reverter a prohibición imposta por Bruxelas. “As administracións locais, a autonómica e a estatal temos que estar unidas para que isto, finalmente, non saia adiante”, esgrimiu a alcaldesa de Viveiro.
No pleno celebrado este martes, toda a corporación, por unanimidade, sacaba adiante unha moción de emerxencia que propuxo a Confraría de Pescadores de apoio ao sector pesqueiro. Os portos de Celeiro, en Viveiro, xunto co de Burela, son das dársenas máis prexudicadas por este veto.
