O BNG de Viveiro realizou unha reunión con veciños e veciñas de Verxeles nun encontro realizado no barrio de Xunqueira. Durante o encontro, a veciñanza alí reunida pediu a mellora da zona de Verxeles, sobre todo en seguridade viaria.
Desde a formación nacionalista sinalan que en novembro de 2022 o BNG rexistrou unha moción en pleno para cambiar a situación da zona de Verxeles. Segundo o documento que presentaron, esta área de Viveiro “suma abandono e falta de planificación nas poucas actuacións que aqui se levaron a cabo, traendo como resultado un lamentábel e perigoso estado das beirarrúas”. Segundo informa o BNG, varios veciños asistentes afirmaron que “en Verxeles é complicado até andar, producíndose numerosas caídas e accidentes”.
A voceira local do BNG, Míriam Bermúdez, destacou a “baixa visibilidade que teñen os vehículos cunhas entradas e saídas que non se colle en ambas direccións, sen visibilidade e que provocan encontros repentinos e inesperados.”
“Faise necesario estudar a posibilidade de establecer como sentido único o remate da Travesía Verxeles á súa saída pola Carnizaría Xunqueira, onde se une coa Avenida Xunqueira, pois o remate deste vial é estreito non permitindo o encontro de dous vehículos”, afirma Míriam Bermúdez.
Ademais disto, durante a xuntanza pediuse estudar a ubicación dos colectores do lixo, ao lado da fonte de Xunqueira e os bancos, lugar onde se reúnen as persoas tendo que aguantar malos olores ademais da contaminación visual que provocan.
