O BNG de Vivieiro apunta nun comunicado que veciñanza da Misericordia continúa esperando “pola reunión que a alcaldesa anunciou que ía manter con ela e xunto cos técnicos municipais, no pasado pleno de novembro”.
Sinalan que despois de 20 anos, a veciñanza leva “sufrindo un grave problema urbanístico de acceso ás súas vivendas e co informe da xerente de Ambulancias Burela corroborando que as ambulancias non poden acceder en caso de emerxencia”.
É por este motivo que desde o Bloque viveirense salienta que a veciñanza da Misericordia tivo que solicitar que “se lle dese voz no pleno para ser escoitada, algo que nunca se fixera no concello e que se conseguiu grazas ás sinaturas das persoas veciñas que empatizaron coa súa situación”.
Míriam Bermúdez, concelleira do BNG, indica que “de algo serviu a súa intervención no pleno, pois comentou a alcaldesa que facendo o inventariado municipal, apareceu un vial que podería dar solución a esta situación, e que sería o persoal técnico do concello quen daría os detalles”. Desde o BNG piden á alcaldesa que convoque a reunión cos veciños e veciñas da Misericordia sen máis demora.