Rogelia, a usuaria da Residencia San Bartolomeu de Xove á que en xaneiro de 2021 deron por morta por covid durante 10 días tras confundila con outra anciá, morreu o luns aos 87 anos de idade.

Segundo confirman a Europa Press fontes coñecedoras daquel caso, Rogelia foi enterrada este martes no cemiterio da parroquia de Xuances, no mesmo nicho no que hai dous anos permaneceu enterrada por erro durante tres meses Concepción, outra usuaria do xeriátrico.

O caso remóntase aos inicios da pandemia por covid-19 e en pleno dispositivo de vacinación das residencias. A confusión tivo como orixe un brote xurdido en decembro de 2020 no centro San Bartolomeu que afectara a 11 usuarios, entre eles as dúas mulleres protagonistas da historia.

A finais daquel ano, a Fundación San Rosendo –entidade responsable do xeriátrico– decidira trasladar en ambulancias a todos os afectados ata outro centro en Pereiro de Aguiar que dispuña dunha planta para atender a anciáns con covid.

O intercambio das identidades entre Concepción e Rogelia produciuse durante un contratempo sufrido no traslado e mantívose durante as semanas nas que ambas compartiron habitación na residencia de Pereiro.

O 13 de xaneiro Concepción faleceu, pero notificouse a morte de Rogelia. O enterro celebrouse ao día seguinte no cemiterio de Xuances, pero os protocolos da pandemia obrigaron a que o cadaleito permanecese pechado, polo que a familia non puido darse conta do erro.

Todo se descubriu aos dez días. O 23 de xaneiro pola mañá, Rogelia, á que deran por morta, volveu ao xeriátrico de Xove ante a sorpresa de todos os alí presentes tras recibir a alta da covid-19. Ese mesmo día, os familiares de Concepción esperábana xa recuperada, pero na residencia comunicáronlles que en realidade xa falecera.

Desde entón, tiveron que transcorrer tres meses e seis días para que este erro queda emendado. Tras varias xestións xudiciais e administrativas, o 19 de abril produciuse o traslado do corpo de Concepción desde o cemiterio de Xuances –onde este martes, dous anos despois, foi enterrada Rogelia– ata o panteón familiar situado no camposanto municipal de Xove.