O condutor do vehículo que saíu da vía e caeu por un terraplén en Xove o pasado 1 de abril, nun accidente no que faleceron catro mozos, saíu da Unidade de Coidados Intensivos (UCI) e atópase en planta do Hospital Lucus Augusti un mes e medio despois.
No accidente faleceron catro persoas que viaxaban no vehículo xunto ao condutor, que ingresou na UCI, e unha sexta persoa que saíu polo seu propio pé e que foi atendido horas máis tarde nun centro sanitario e do que foi dado de alta ás poucas horas.
Tras o sinistro, o Xulgado de instrución número 2 de Viveiro, en funcións de garda, abriu dilixencias sobre o sinistro e autorizou a remisión de mostras de sangue a un laboratorio, que arroxaron un resultado positivo de alcol no condutor. O xulgado no seu día informou de que estaba á espera da saída da UCI para tomarlle declaración ao condutor, unha dilixencia da que por agora non transcendeu máis información.
O accidente produciuse o 1 de abril no quilómetro 1.100 da LUP-2604 nunha curva pronunciada na Rigueira, nas proximidades da urbanización Palmeiro, en Xove, e foi localizado por un veciño ás 9,40 horas do sábado, pero estímase que ocorreu varias horas antes. No asfalto non quedaron sinais de freada do vehículo.