Este 23 de novembro deron comezo en Xove os actos conmemorativos do 25N, Día Internacional da Eliminación da Violencia contra as Mulleres, coa representación do recital teatralizado: “As Fillas Bravas de Momán”, do grupo Chévere.
Á representación acudiron máis dun cento de persoas: todo o alumnado da ESO do IES Illa de Sarón de Xove, persoal e usuarios da Residencia para Persoas Maiores San Bartolomé de Xove, e persoal e usuarios do Centro de Día Coidando de Vós, de Burela, ademais de outro público en xeral.
A obra está representada polas actrices Patricia de Lorenzo, Mónica García e Arantza Villar, quen durante aproximadamente unha hora repasaron cantigas e coplas tradicionais cos lentes da perspectiva de xénero, reivindicando o papel das mulleres nas sociedades de antes e de agora, e promovendo unha visión crítica do machismo transmitido de xeración en xeración a través do cancioneiro popular e, polo tanto, da cultura.
