O Concello de Ribadeo e a Asociación de Comerciantes, Industriais, Servizos e Autónomos (Acisa) presentaron o cartel da quinta edición do Ribadeo Indiano. A festa coa que o municipio homenaxea o legado dos emigrantes celebrarase os días 6, 7 e 8 de xullo. O póster, segundo explicou a concelleira de turismo ribadense, Ana Martínez, evoca “os tellados das casas indianas, que son unha identidade notable da localidade”.
A edil animou “á xente a que preparen as súas roupas, os seus traxes, para participar nas actividades”. A programación, resaltou, está aínda por pechar. Martínez agradeceu “a quenes colaboraron de xeito anónimo e desinteresado con este proxecto, que comezamos dunha maneira un pouco dubidosa, porque non sabiamos o que podía traer. Hoxe é un evento non soamente festivo, senón cultural, de recuperación histórica e da nosa identidade da nosa terra con ultramar, con América”, asegurou.
“MOITAS NOVIDADES”
Pola súa banda, o presidente da Acisa, Francisco Iriarte, resaltou que este ano haberá “moitas novidades” nunha festa que “cada ano é máis importante, a xente agarda por ela. Vemos o interese que esperta tanto en Ribadeo coma nos arredores e incluso fóra de Galicia”, asegura.