A Asociación de Comerciantes, Industriais, Servizos e Autonómos (Acisa) de Ribadeo denuncia “micro cortes de luz case a diario” en plenas festas patronais, o último deles na mañá deste xoves.
O xerente de Acisa, Jesús Pérez, calificou de “vergoñentos e intolerables” estas caídas da subminitración na semana grande e pide á eléctrica Viesgo que se “responsabilice dos danos causados cada vez que se vai a luz, sexan tres segundos ou cinco minutos”. “É lamentable que en pleno século XXI teñamos esta situación, con todo o que iso supón para as empresas”, engadiu.
DANOS NOS LOCAIS
Segundo explicou, “cada vez que se producen estes cortes de luz recibimos na nosa oficina ducias de chamadas dos nosos asociados e asociadas queixándose dos danos e prexuízos que todo isto lles ocasiona. Sempre hai algunha máquina que se queima”.
“Seguimos sen entender o que está a pasar cando ademais contamos cunha nova subestación eléctrica, que se supoñía que ía poñer fin a toda esta problemática, que xa é moi vella, e que desgraciadamente continúa. Queremos que Viesgo nos explique qué está a pasar en Ribadeo”, esixiu Pérez.
DÍA DA PATROA
Desde Acisa “animan” aos establecementos a pechar as súas portas o vindeiro domingo 8 de setembro, día da patroa.
Aínda que durante o resto do ano, o comercio ribadenses abre os domingos pola mañá, a asociación “recomenda” neste caso descansar e gozar dos festexos. Confirman que os supermercados e “a maior parte do comercio pequeno” terán pechado.
