A organización do Illa Pancha Challenge, o desafío de surf que se celebra en Ribadeo, deu a coñecer este luns o período de espera para a segunda edición do reto, que se celebrará entre o 1 de xaneiro e o 31 de marzo.
Os promotores advirten de que se non se desen as condicións climáticas idóneas para surfear o ‘Panchorro‘, unha onda das denominadas xigantes, que se espera que alcance entre os 15 e os 20 metros de altura, o período de espera para o Illa Pancha Challenge 2020 activarase entre o 1 de outubro e o 31 de decembro.
Segundo expuxo a organización, a segunda edición ten a “meta clara” de “superar a onda surfeada por Natxo González e Adrián Fernández, que alcanzou os 14,71 metros”.
LUCAS ‘CHUMBO’ E IAN COSENZA, PRIMEIROS GAÑADORES
Á altura das ondas nesta zona únese outro atractivo, e é que a especial situación de Illa Pancha fai que os seareiros poidan ver as evolucións dos surfistas desde moi preto.
Na primeira edición, Lucas ‘Chumbo’ e Ian Cosenza impuxéronse ao dúo formado por Everaldo Pato e Pedro Scooby na final dun evento que congregou a numeroso público tanto en Ribadeo como nas redes sociais.
