O Concello de Barreiros denunciou ante a Garda Civil que persoas descoñecidas cortaron o cableado do fornezo eléctrico do cadro de bombeo do depósito de Angiueira, desde onde se bombean augas residuais das casas da zona ata a depuradora. A avería foi reparada sen que afectase ao servizo.

Segundo explica a alcaldesa, a nacionalista Ana Ermida, foi un técnico municipal quen, nunha revisión rutinaria, advertiu que o pozo rebordaba. O cadro de bombeo precisou dunha reparación que custou arredor de 300 euros, pero os danos poideron ser maiores, dado que os vándalos cortaron o cable neutro, o que puido provocar que a bomba se queimase.

A área é unha zona maioritariamente de segundas residencias, polo que a carga é menor que noutros lugares do municipio e o tempo que transcurriu entre que se cortou o cableado e se procedeu á reparación, cuxa duración o Concello descoñece, non supuxo que o servizo se vise afectado.

O goberno local denunciou os feitos ante a Garda Civil. “Como estaba cortado o cableado demostra que foi adrede, non unha falcatruada de pícaros. Para iso precísase un determinado material, pero pensar nun sabotaxe é estraño. É algo ao que non lle atopamos sentido, pero que si puido provocar danos máis cuantiosos e un problema para todos”, concluíu Ermida.