A Deputación Provincial de Lugo concretou que as probas de coronavirus realizadas na residencia de Trabada, onde se localizou nas últimas horas un positivo entre o persoal de Mensajeros de la Paz, foron todas negativas.
O goberno provincial concretou que o laboratorio comunicou na tarde deste mércores que as 49 PCR realizadas -aos 27 usuarios e 22 traballadoras do centro- foron negativas, incluíndo unha segunda análise realizada tras unha proba “non concluínte”.
O cribado, concreta, foi realizado a primeira hora deste mércores, tras adquirir os kits para a realización das probas PCR, por “persoal sanitario da Deputación de Lugo, coa formación técnica necesaria para a recollida de mostras”.
A través dun comunicado de prensa, a Deputación explica que toda a comunidade do centro de maiores, residentes e traballadoras, sometéronse tamén ás probas diagnósticas prescritas polo Servizo Galego de Saúde (Sergas).
A persoa traballadora que resulto infectada, conclúe o executivo provincial, está “asintomática” e “non tivo contacto coa comunidade do centro de maiores desde hai seis días, cando foi coñecedora de ser contacto directo con outra persoa traballadora da residencia de maiores de San Cibrao que resultou positiva”.
A Deputación recibe “con satisfacción” este resultado e argumenta que “os protocolos de seguridade que aplica nos centros de maiores da súa titularidade dende antes da declaración do primeiro Estado de Alarma, en moitas ocasións con medidas por riba das establecidas polas autoridades sanitarias, están dando bo resultado”.
