A portavoz nacional do BNG, Ana Pontón, participou este venres na presentación da candidata da formación nacionalista á alcaldía de Barreiros, Ana Ermida, á que definiu como “unha muller que demostrou nestes catro anos a súa capacidade de goberno: en positivo, con honradez e transparencia, con eficacia na xestión, con diálogo e sempre coas portas abertas, capaz de sacar o concello dunha etapa negra e avanzar cara ao futuro, traballando sempre a favor dos veciños”.
A líder do Bloque destacou que, durante os últimos anos á fronte da Alcaldía, Ana Ermida e o seu equipo demostraron ” que se pode gobernar a favor do ben común”, pondo “ás persoas no centro e sempre coa man tendida e as portas abertas”. Por iso, confiou na súa capacidade para revalidar o apoio dos veciños.
Pontón lembrou os avances logrados polo goberno local, empezando por “implantar unha xestión eficaz e transparente”, a posta en orde no “descontrol económico” do concello, a mellora dos servizos públicos, o avance nas infraestruturas básicas ou os programas que se desenvolveron a favor das familias e da igualdade.
UNHA SITUACIÓN COMPLEXA
Na súa intervención, a líder do BNG lembrou que a campaña cara ás municipais ten lugar dun contexto de “gran dificultade”, no que “mes a mes a cidadanía comproba como os prezos soben máis en Galicia”, a pesar de ter salarios “por baixo da media” e “as segundas pensións máis baixas de todo o Estado”.
A situación vese agravada, dixo Pontón, por un Partido Popular “insensible aos problemas da xente”, “instalado na rutina, sen proxecto e sen impulso político” e “incapaz de tomar nin unha soa medida relevante para sacar Galicia adiante”.
Pola contra, a portavoz nacional comprometeu o traballo do BNG en contra desta situación, “tomando medidas para frear a especulación coa vivenda ou cos alimentos, reclamando que a banca devolva os 90.000 millóns do rescate bancario ou pondo un tope de prezo aos carburantes”. Ademais, engadiu que “é posible facer unha intervención pública para que a electricidade sexa un ben propio, creando unha tarifa eléctrica galega”.
A continuación, a portavoz nacional puxo o foco na necesidade de presentar alternativas a favor da maioría social, defendendo os servizos públicos, particularmente unha sanidade pública “cunha atención primaria colapsada”.
