O Concello de Barreiros prohibiu o uso de auga da traída municipal para usos non prioritarios debido ao incremento do consumo de auga potable, xunto coa situación de escaseza de choiva dos últimos meses.

Tal e como notificou nun bando municipal, o consistorio afirmou que os depósitos de abastecemento están a verse afectados e pode producirse insuficiencia de auga.

Por iso, desde este fin de semana prohibiu o uso de auga da traída para todos aqueles usos que non sexan prioritarios. No bando, o Concello concretou que non se pode empregar para regar xardíns (excepto plantacións alimentarias), encher piscinas, limpeza de vehículos e calquera outro uso “que non responda a necesidades básicas de persoas ou animais”.

Este comunicado tamén lembra que o incumprimento desta prohibición pode dar lugar a “a imposición de sancións tipificadas no artigo 33 da Ordenanza reguladora por uso non autorizado” e que suporían a facturación do período ao triplo da cantidade tarifada, así como, chegado o caso, o corte da subministración sen necesidade de comunicación previa á persoa interesada.