A romería está vinculada á capela homónima, que data de mediados do século XVII, e está situada a carón do Pazo de San Caetano. Logo dun tempo sen celebrarse, recuperouse a mediados dos anos 80, unida a un evento gastronómico que cumpre a súa vixésimo terceira edición, a exaltación da tortilla.

VENRES

O venres 17, a xornada festiva será pola noite. Comezará ás 21.00 horas, cunha degustación de torresmos e chourizos, que amenizará o grupo de música tradicional Vai Ser Boa. A continuación, haberá sesión DJ coa discoteca móbil Mourelle.

SÁBADO

O sábado 18, o programa empezará sobre as 11.00 horas, coa elaboración da gran tortilla de San Caetano, tan grande que é preciso utilizar un tractor para darlle a volta. Ademais, desde as 12.00, os interesados en participar no concurso de tortillas poden presentar as súas receitas ata as 13.00.

Daquela esta prevista a misa na capela, con posterior procesión. Acto seguido, haberá sesión vermú amenizada pola charanga de Moaña A Cabeza non Para. Ao remate do baile servirase a tortilla.

Pola tarde, Pakolas presentará o seu espectáculo ‘As parábolas de Pakolas‘, e celebraranse xogos tradicionais. Ás 20.00 horas comezará o concurso Máster Tortilla. O dúo Diamantes porá ritmo á noite, que rematará co baile do farolillo e a chocolatada.