InicioOrientalBarreirosA Asociación Camiñantes e Camiños realiza unha homenaxe ao profesor Emilio Piñeiroa

A Asociación Camiñantes e Camiños realiza unha homenaxe ao profesor Emilio Piñeiroa

A asociación barreirense tamén está percorrendo o Camiño Inglés en sete etapas con cincuenta persoas apuntadas a este evento.

Publicada o

- Advertisement -

A asociación cultural de sendeirismo Camiñantes e Camiños, de Barreiros, realiza o Camiño Inglés en 7 etapas. Ao redor de 50 persoas danse cita nesta iniciativa, que a súa directiva decidiu retomar despois de dous anos de parón, orixinado pola pandemia do covid. O vindeiro sábado, 14 de maio, farán a etapa comprendida entre Pontedeume e Betanzos.

O presidente do colectivo, José Manuel Gómez Puente, explica que “son 7 etapas de 17 quilómetros cada unha e xa empezamos; fixemos dous: o 9 de abril a comprendida entre Ferrol e Neda e o 15 de abril Neda-Pontedeume. Quédannos cinco etapas máis. A próxima será este sábado, 14 de maio, para continuar todos os sábados seguintes ata o 11 de xuño. A hora de saída desde Barreiros é á 7 e media da mañá en autobús ata o lugar de inicio da etapa que corresponda. Temos xa apuntadas a 50 persoas, pero poden participar algunhas máis: se a alguén lle apetece e anímase pode apuntarse aínda”.

A peregrinación de Camiñantes e Camiños deste 2022 está dedicada a Emilio Piñeiroa: “este 2022 é especial e ademais tivemos a mala sorte de que morreu Emilio Piñeiroa hai un ano xustamente. Co permiso da familia levamos impreso o seu nome nunha gorra cun logotipo que nos parece moi apropiado, feito por unha veciña de Celeiro de Mariñaos, Oliva Canoura, que nos transmitiu que o fondo do logotipo é o monte Cornería, que supón un símbolo de grandeza e de forza para Barreiros, e inclúe tamén unha forma de vieira con nove frechas e nunha delas, a máis significativa, que apunta cara arriba, indicándonos o camiño para seguir. E imprimimos o nome de Emilio Piñeiroa. A familia permitíunolo e agradecémosllo porque é unha persoa que fixo moito polo Camiño Norte ao seu paso por Barreiros, defendeuno e hai que agradecerllo. Por tanto este ano vai ser unha homenaxe a el e terémolo sempre presente. Ademais Emilio Piñeiroa deu clases en San Miguel, onde fixo un labor moi boa, por exemplo recompilando os hórreos, cabozos e pombais. Á parte sempre estaba moi preocupado facendo estudos e solicitando información sobre capelas de varias parroquias. Entón creo que lle debemos esta homenaxe, que é humilde: imos levalo connosco e esperemos que este camiño chegue a bo fin e sexa unha homenaxe a el e á súa familia”, indica o presidente de Camiñantes e Camiños.

A Xunta de Galicia, a través do Xacobeo 21-22, colabora con esta asociación barreirense. Gómez Puente conta que “este pasado domingo fixemos un acto no que entreguei a todos os participantes unhas camisetas do Xacobeo, que nos deu a Xunta de Galicia, e estreámolas facendo un roteiro pequena: desde Santiago de Reinante, que é moi simbólico porque é unha parroquia que leva o nome de Santiago Apóstolo, ata San Miguel para volver ao comezo do percorrido en Reinante. Foi un roteiro bonito, na que nos acompañou o tempo e gozaron os 30 peregrinos que nos acompañaron”.

O presidente de Camiñantes e Camiños, de Barreiros, engade que “as cinco etapas que nos faltan para completar o Camiño Inglés son de 17 quilómetros, que se poden realizar a 5 quilómetros por hora máis ou menos e levaranos 3 horas e media ou catro aproximadamente. Faise a un ritmo normal, cada un ao seu, porque o que prima é participar sen cansarse. E despois acabamos nun restaurante da zona para comer o menú que nos ofrecen e nos que sempre nos tratan moi ben, como ocorreu nas dúas etapas que fixemos xa. Para esta próxima tócanos comer en Betanzos o día 14 e esperemos que o 11 de xuño cheguemos a Santiago todos xuntos e sempre unidos”.

A asociación cultural de sendeirismo Camiñantes e Camiños, de Barreiros, foi fundada en 2010. Agora retoma as súas actividades despois dun tempo de parón. A nova directiva está formada por: Manuel Bao, Mónica Expósito, Jesús Palmeiro, Adrián Expósito e José Manuel Gómez.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...