InicioOrientalBarreirosBarreiros inicia obras de renovación da tubaxe para fornecer de auga a...

Barreiros inicia obras de renovación da tubaxe para fornecer de auga a varios núcleos de poboación

A alcaldesa de Barreiros, Ana Ermida, sinala que o tramo renovado tiña unha serie de defectos que prexudicaban un fornecemento de calidade de auga.

Publicada o

- Advertisement -

A alcaldesa de Barreiros, Ana Ermida, acompañada do goberno municipal, visitou nesta semana o inicio das obras de renovación da tubaxe de abastecemento de auga potable entre San Cosme e os núcleos de A Áspera e Vilar.

Os traballos realizaranse esta semana para a renovación da canalización desde San Cosme por medio de tubaxe de 160mm de diámetro ata o cruce de enganche coa rede de subministro a ditos barrios. Tamén se executarán obras para as arquetas de conexión precisas para garantir o abastecemento a ambas poboacións. Estas obras, foron adxudicadas por un importe de 65.027,46 euros á empresa Construcciones y Canalizaciones José Saa, SL; contando cun finanzamento do 95% da área de medio rural da Deputación Provincial de Lugo, dirixida por Mónica Freire.

A alcaldesa explicou que “este tramo do abastecemento está en dous estados diferentes, un primeiro tramo que está executado en precario desde hai bastantes anos -a raíz dos continuos problemas que xurdían na zona-, cunha tubaxe ao aire libre que non cumpre cos mínimos urbanísticos nin de saúde pública, que se trata dun material plástico exposto ás inclemencias meteorolóxicas e polo tanto, ás modificacións que poida sufrir o material polo que discorre a auga potable como consecuencia dos cambios de temperaturas. Un segundo tramo, discorre por tubaxe antiga de fibrocemento que está sometida a continuos cambios de presión en función do consumo e que xera constantes problemas de roturas e avarías que inciden na calidade do subministro de auga que chega a fogares e explotacións existentes.”

Montse Porteiro, concelleira responsable deste servizo, explicou que “esperamos ao final do verán para iniciar as obras co fin de non afectar ao subministro nunha época na que o consumo se incrementa moitísimo e adoita haber máis dificultades. En todo caso, as obras prevén a súa finalización no mes de outubro, polo que queremos pedir comprensión ás persoas que poidan verse afectadas, ben no propio subministro, ben no uso da estrada que baixa cara Viladaíde, xa que afectan a parte da mesma; aínda que se tratarán de minimizar as molestias.”

Nos últimos tres anos, os investimentos na rede e elementos de abastecemento de auga aproximáronse ao medio millón de euros; o que permitiu atallar grandes problemáticas existentes desde había anos que afectaban notablemente ao servizo que se ofrecía desde o Concello. Neste sentido, a alcaldesa lembra que “este verán, pese á complicada situación hidrolóxica a nivel xeral que supuxo o estado de prealerta de seca desde o mes de febreiro, en Barreiros non existiron incidencias importantes no subministro e por primeira vez en anos, as recomendacións quedaron só niso e non houbo que establecer prohibicións.”

A concelleira delegada encargada do abastecemento de auga potable, Montse Porteiro, amósase satisfeita cos resultados das xestións realizadas, mais anima a “manter a prudencia, pois a situación climática é complexa e a declaración de seca segue vixente; polo que podemos ter un outono complicado en canto ao nivel de auga nos acuíferos.” En calquera caso, Porteiro resalta “ a importancia de realizar traballos que moitas veces non se perciben desde a veciñanza, como a renovación de tubaxes ou a posta en marcha de protocolos de funcionamento que permiten que a auga potable que chega aos fogares non só estea garantida, senón que mellorara notablemente a súa calidade; como acontece cos episodios de turbidez que, se ben é certo que se continúan a producir como consecuencia de ter unha captación natural dun río, foron reducidas ao mínimo e só se dan en momentos moi concretos.”

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...