A alcaldesa de Barreiros, Ana Ermida, dirixiuse ao conselleiro de sanidade para poñer no seu coñecemento “a situación que se está a vivir no centro de saúde da localidade; onde a día de hoxe só hai unha médica para a atención sanitaria“.
A alcaldesa sinala que durante este pasado verán, a presión asistencial no centro de saúde foi moi elevada ao non existir reforzo de persoal, cunha soa profesional. Isto supón que a atención que a profesional pode prestar “sexa escasa en tempo e chega mesmo a afectar a trámites básicos, como a emisión de informes de saúde para a tramitación municipal de expedientes de servizos sociais, como dependencia ou servizo de axuda no fogar.”
Ana Ermida explicou que “é lóxico que unha soa persoa non poida atender coa calidade que merecen 3000 persoas, máis a xente desprazada que segue habendo, saíndo a domicilios e a urxencias”. Ermida resalta a constante presión sobre os profesionais que “cada vez ven como teñen menos tempo para as consultas e teñen que atender pacientes que precisan dun estudo da historia clínica para o que tampouco teñen tempo.”
Neste sentido, a rexedora comunicoulle ao máximo dirixente da sanidade galega que “a falla de persoal no SERGAS non só afecta á poboación que precise atención sanitaria, senón que está afectando e retrasando outro tipo de atencións sociais que, en moitos casos, son urxentes e imprescindibles.”
Por todo isto trasladoulle a preocupación e o malestar existente coa xestión que se está a realizar dos centros de saúde -reducindo a atención e degradando a existente- que desembocará, de non solucionalo, en graves problemas sociais.
SITUACIÓN “CAÓTICA” EN VIVEIRO
A Plataforma Sanitaria da Mariña denuncia a “caótica situación que está a vivirse hoxe no centro de saúde de Viveiro, onde dun total de dez facultativas no cadro persoal hoxe só hai dúas médicas para un total de quince mil habitantes”. Estas dúas facultativas unicamente están a atender urxencias.
Por outra parte, a Plataforma tamén denuncia que unha caída na rede informática está a impedir o normal funcionamento das outras categorías profesionais. Xunto a isto, as dúas profesionais de Viveiro tamén teñen que atender ás persoas desprazadas dos concellos de Ourol e O Vicedo.
