O BNG de Ribadeo emitiu un comunicado onde valora os case vinte e catro anos de dedicación á vida política ribadense do actual alcalde Fernando Suárez Barcia, quen anunciou que non se presentaría para a reelección á alcaldía de Ribadeo. Para o BNG ribadense “foron uns anos intensos e cheos de actuacións que transformaron o noso concello, mellorando a nosa calidade de vida e facendo de Ribadeo un referente comarcal, a unha e outra beira da ría de Ribadeo, e no conxunto de Galiza e a cornixa cantábrica”.
O grupo nacionalista valora tamén o traballo do equipo de concelleiras e concelleiros “que deron o mellor de si mentres desenvolveron as súas responsabilidades de goberno”, e que Fernando Suárez Barcia “soubo dirixir unha acción de goberno da que queremos destacar a xeito de resumo as políticas de infraestruturas e de protección social, desenvolvemento económico e potenciación da actividade deportiva e cultural”.
“Co paso dos anos xa nos familiarizamos cunha serie de actividades que asociamos á vila ribadense con total naturalidade, pero non debemos esquecer que todas elas foron postas en marcha polo goberno municipal do BNG con Fernando Suárez Barcia dirixíndoo. Tamén abordamos medidas de protección social”.
A todo isto engaden que “fomos quen de elixir unha persoa que releve a Fernando Suárez Barcia”. Isto último en referencia a Pablo Vizoso Galdo, actual tenente de alcalde e concelleiro delegado de Economía, Comercio, Turismo e Desenvolvemento Local.
O BNG sinala sobre Pablo Vizoso Galdo que “ten demostrado ao longo deste mandato a piques de rematar a súa valía como responsábel público”. O Bloque ribadense sinala o currículo que ten detrás Vizoso de cara as vindeiras eleccións locais. Entre outras, o seu traballo nas áreas de Economía, Turismo, Comercio e Desenvolvemento Local. Por último “desde a área de Turismo, ben coordinada con outras áreas moi activas como Cultura e Deporte, logrou dinamizar a vida económica e social de Ribadeo”.
